Ti saprak boga motor, teu lila sanggeus boga pamajikan, uing can kungsi mayar nu ngaranna pajeg. Cēk pikir tēh, jang nanahaon mayar pajeg, da geuning lolobana mah duit pajeg tēh kadon nyarangsang dina pēsak, lokēt, rēkening, atawa beuteung bucitreuk nu ngurusna.
Tapi kamari ieu mah rada maksakeun mayar pajeg. Enya, da ēta motor butut tēh rēk diborehkeun. Butuh duit jang ngomēan suhunan imah nu mēh runtuh. Orokaya, mayar pajeg tēh geuning gedē kacida. Atuh kapaksa cēngcēlēngan indung budak dipeupeuskeun. Nu bogana baeud. "Ari Abah mayar pajeg atawa karampogan", pokna. Uing ukur bisa ngaheruk. Komo basa narima duit ladang ngaborehkeun motor anu teu sabaraha. Boro-boro jang ngomēan suhunan tēa, dalah jang mulangkeun sakadang imut kana biwir indung budak gē can cumpon. "Abah, Ujang sareng Mbu badē bobo di bumi Enin. Sieun runtuh bumina di dieu mah", cēk keretas nu napel dina panto.
Tidak ada komentar:
Posting Komentar