INDA NUGRAHA HIDAYATKalan-kalan sok makē sandi asma Agha N Graha. Gumelar di Garut, ping 7 Maret. Icikibung dina kubangan tēater ti taun 2003. Kungsi ilubiung di Studiklub Teater Bandung, Komunitas Teater Transformasi Bandung, Lasykar Panggung Bandung, Posstheatron Garut, sarta ngilu ngokolakeun Himpunan Seniman Sastra Drama Garut. Kaasup salahsaurang nu marajian Tēater Sangsetia SMAN 11 Garut, tug tepi ka disupata jadi pupuhuna nu mimiti.
Lian ti nēater, sok pirajeunan tulas tulis jadi sajak, carpon, cerpen, naskah drama jeung salian ti ēta. Malah kungsi meunang panglēlēr minangka pinunjul kadua pasanggiri nulis sajak sunda sa-Jawa Barat, nu diayakeun ku Disparbud Jabar taun 2008. Kungsi deuih nyangking rēngking 2 lomba cipta cerpen, nu diayakeun ku HIMADIKSATRASIA UPI Bandung. Tulisanna bacacar dina Koran Galura, Pikiran Rakyat, Majalah Manglē, Majalah Kandaga, Koran Radar Tasikmalaya, Kabar Priangan, Koran Garut Express, Antologi Puisi Resonansi Waktu (Komunitas Kalam Garut, 2003), Antologi Puisi Pemenang Lomba Cipta Puisi Berbahasa Daerah (Disparbud Jabar, 2008), Antologi Puisi Di Suatu Negeri Bernama Indonesia (Himadiksatrasia STKIP Garut, 2006), Antologi Puisi Munajat Sesayat Doa (Leutika Prio, 2009), jeung salian ti ēta.
Dina widang maca sajak, kungsi sababraha kali jadi pinunjul dina pasanggiri maca sajak, boh di tingkat kabupatēn, pon di tingkat propinsi. Ayeuna mah remen diperih sangkan jadi juri atawa girang pangajēn dina pasanggiri maca sajak.
Ayeuna, digawē di PT Radio Antares Garut, minangka Production Director. Kalan-kalan kapaksa kudu siaran, nyuluran penyiar nu teu bisa mancēn gawē. Atuh jang nambah-nambah waragad jajan nu jadi anak, mun keur hadē poēna mah sok aya nu ngengkēn kudu ngēmsē.
Jeung anak pamajikan, matuh di puseur kota Garut.
Tidak ada komentar:
Komentar baru tidak diizinkan.