Karumasa

bari jeung semu rumengkog, anjeun ngabedah
karumasa nu mangpirang purnama nayeum
na kokobak rasa
sakeclak
sakeclak
ungkara-ungkara dumareuda nyikaracak
tina seuseukeut teuteup
patēmbalan jeung harēwos impian
nu ngalakay kabawa angin

peuting teu leungiteun jempling
najan jaladri sēah na dada
silih sigeung jeung kikisik ati
nu ngampar sapanjang basisir pikir
basa anjeun ngabedah kacua
ka sakadang tresna nu teu daēk ingkah tina manah
ka sakadang sono nu pogot ngalēndotan
ka sakadang asih nu mingkin tigin
ka sakadang tineung nu kari bangkarakna

kapan geus parat anjeun nirukkeun asih kana galeuh ati
mangkeluk cidra kumelendang kēnēh geuning
ngagorogotan sajak-sajak romantis
jadi harēwos-harēwos ērotis
ngaririwaan angen-angen jeung sirung
harepan nu kakara renung
ngagadabah kasatiaan
nyēsakeun amarah nu ngagolak na kongkolak otak


*)
Dimuat dina Rubrik Budaya Kabar Priangan, Rebo, 23 Maret 2011